Axencia Galega das Industrias Culturais

Xunta de GaliciaAxencia Galega das Industrias Culturais

Noticias

UN TOTAL DE 22 ALUMNOS ASISTE ÁS CLASES DO MESTRE SUECO DENDE HOXE E ATÉ O DÍA 24

Bo Nilsson imparte un curso de trompeta na Escola de Altos Estudos Musicais

[20/11/2004] O mestre sueco Bo Nilsson, recoñecido pedagogo e trompeta solista da Orquestra Sinfónica de Malmö (Suecia) durante os últimos corenta anos, imparte o Curso de Trompeta que se desenvolve dende hoxe e até o vindeiro día 24 na sede da Escola de Altos Estudos Musicais en Santiago. Un total de 22 alumnos asiste a este encontro, enmarcado no programa lectivo da Sección de Formación Permanente deste centro para a educación musical que xestiona o IGAEM.

Durante a súa estadía en Compostela, e coa colaboración de Lorenzo de los Santos como pianista acompañante, Nilsson abordará diferentes contidos que teñen que ver coa teoría e técnica interpretativa da trompeta, co estudo de obras e coa interpretación en grupos.

Bo Nilsson posúe unha recoñecida traxectoria como profesor deste instrumento, carreira que desenvolveu en diferentes centros, como a Universidade de Melbourne (Australia), a Toho School of Music de Tokio (Xapón), a Trompeten-Akademie de Bremen (Alemaña) e, dende 1998, o University’s College of Music de Malmö (Suecia). A súa actividade docente inclúe, ademais, numerosos encontros monográficos e seminarios impartidos en Suecia, Italia, Suíza, Estados Unidos, España e Xapón.

A súa gran reputación entre os instrumentistas de metal débese principalmente a que está considerado un gran especialista en técnicas de respiración e embocadura. De feito, entre os seus alumnos figuran non soamente trompetistas, senón tamén trombonistas, trompas, etc. Bo Nilsson é, así mesmo, membro habitual dos xurados de concursos internacionais de trompeta como o ARD de Múnic, Xenebra e París, entre outros.