Axencia Galega das Industrias Culturais

Xunta de GaliciaAxencia Galega das Industrias Culturais

Noticias

MEMORIAS DO TEATRO, DRAMATURXIAS.CON E O CURSO DE LITERATURA DRAMÁTICA DESENVÓLVENSE NA SEDE DA ESCOLA EN VIGO ENTRE OS MESES DE MARZO E MAIO

A AGADIC patrocina tres ciclos da ESAD sobre historia do teatro en Galicia e creación dramática en galego

[01/03/2010] A Axencia Galega das Industrias Culturais (AGADIC) da Consellería de Cultura e Turismo colabora coa Escola Superior de Arte Dramática (ESAD) de Galicia na organización do programa Ciclos ESAD 2010, no marco do que se celebrarán tres encontros centrados na historia do teatro en Galicia e na creación dramática en galego: Memorias do Teatro (do 3 de marzo ao 12 de maio), Dramaturxias.con (do 16 de marzo ao 26 de maio) e Curso de Literatura Dramática Galega (do 16 de marzo ao 25 de maio). As tres iniciativas, dirixidas tanto aos alumnos do centro como a todas as persoas interesadas nestas materias, desenvolveranse na Sala Pedra Seixa da nova sede da ESAD en Vigo.

O ciclo Memorias do Teatro abre esta programación o 3 de marzo cun relatorio a cargo do actor Antón Durán "Morris", ao que seguirán as conferencias da actriz, directora e dramaturga Dorotea Bárcena (24 de marzo), do actor, iluminador e director Xúlio Lago (14 de abril) e do dramaturgo, narrador oral e director Cándido Pazó (12 de maio). Con esta serie de intervencións, que en todos os casos darán comezo ás 16.30 h, a ESAD quere recuperar a historia recente e pasada do teatro galego dando a palabra aos seus auténticos protagonistas nos diferentes ámbitos profesionais implicados.

Dramaturxia contemporánea

Pola súan banda, o ciclo Dramaturxias.con articúlase como un marco de encontro, comentario, análise e reflexión sobre as tendencias contemporáneas no eido da escrita dramática, coa intención de promover o debate e a interacción cos propios dramaturgos. A escritora, tradutora e ensaísta María Xosé Queizán inaugurará este segundo encontro da ESAD o vindeiro 16 de marzo ás 16.30 h. No mesmo horario terán lugar ás outras dúas citas de Dramaturxias.con: o 28 de abril co dramaturgo, actor e director teatral Gustavo Pernas Cora e o 26 de maio co tamén dramaturgo, ademais de guionista e actor de dobraxe, Raúl Dans.

Os Ciclos ESAD 2010 inclúen, así mesmo, o Curso de Literatura Dramática Galega que o director da Escola Superior de Arte Dramática, Manuel F. Vieites, impartirá os días 16 e 23 de marzo, 6, 20 e 27 de abril e 4, 11 e 25 de maio entre as 18.30 e as 20.30 horas.

Este terceiro encontro ofrecerá unha visión panorámica da creación dramática realizada en galego dende finais do século XIX ata os nosos días. A partir do comentario e análise de textos dramáticos, buscaranse asemade liñas de investigación e traballo para os creadores escénicos.

Documentación
Ligazóns