Axencia Galega das Industrias Culturais

Xunta de GaliciaAxencia Galega das Industrias Culturais

Noticias

TRALO ÉXITO OBTIDO DURANTE A SÚA EXHIBICIÓN NO SALÓN TEATRO DE SANTIAGO, A PRODUCIÓN DA COMPAÑÍA PÚBLICA VISITARÁ OUTROS SETE ESCENARIOS ATA PRIMEIROS DE ABRIL

O Centro Dramático Galego inicia en Narón a xira galega de "As actas escuras"

[18/02/2010] O Centro Dramático Galego (CDG) inicia mañá en Narón o período de distribución da súa última montaxe, As actas escuras, obra de Roberto Vidal Bolaño recuperada para os escenarios da man do director Xúlio Lago e dun elenco integrado por 14 recoñecidos actores e actrices. Tralo éxito de público obtido durante a súa exhibición no Salón Teatro de Santiago, onde congregou un total de 2.593 espectadores nas 17 funcións ofrecidas, o espectáculo presentarase no Pazo da Cultura naronés (venres 19 ás 20.30 horas e sábado 20 ás 20.00 h) como primeira parada dunha xira que se estenderá ata primeiros de abril e durante a que visitará un total de sete localidades galegas.

As actas escuras

Esta primeira posta en escena de As actas escuras, texto gañador do Premio Xacobeo de Textos Teatrais en 1992, supón todo un fito no actual panorama escénico galego, achegando finalmente aos espectadores este gran drama sobre a ocultación da verdade e o sentido da ética no que se reflicten tanto a forza simbólica como o espírito crítico característicos de Vidal Bolaño, un dos grandes nomes do teatro galego contemporáneo. Neste sentido, Xúlio Lago asumiu a dirección escénica desta produción desde a fidelidade á obra orixinal e á visión do teatro que tiña o propio autor, falecido en 2002.

Investigación sobre os restos do Apóstolo

Xosé Manuel Olveira "Pico" e Ricardo de Barreiro encabezan o elenco, do que tamén forman parte César Cambeiro, Ursia Gago, Jouse García, Mónica García, Teté García, César Goldi, Xoán Carlos Mejuto, Fernando Morán, Rodrigo Roel, Pepe Soto, Agustín Vega e Marcos Viéitez. Estes 14 intérpretes, moitos dos cales tiveron a oportunidade de traballar baixo as ordes de Vidal Bolaño en diferentes espectáculos, encarnan os trinta personaxes ideados polo autor para desenvolver esta trama, centrada nunha investigación sobre o redescubrimento dos restos do Apóstolo na Compostela da segunda metade do século XIX.

Xogando cos xiros de varios paneis móbeis, o espazo escénico e o atrezzo deseñados por Rodrigo Roel facilitan os rápidos cambios de escena e ambientación que guían ao espectador nun percorrido pola cidade: a vella estación de Cornes, unha fonda, o café El Siglo, un salón de barbeiro, os sotos da catedral, os salóns do palacio arcebispal… No equipo artístico de As actas escuras figuran asemade Antón Arias Marsal, quen compartiu con Xúlio Lago o deseño de iluminación; Manuel Riveiro, a cargo do deseño do espazo sonoro e La Canalla, do vestiario. Ademais, María Armesto exerceu como axudante de dirección.

A obra comeza coa chegada a Compostela do monxe dominico Don Mauro, quen a petición do cardeal Payá e Rico, máxima autoridade eclesiástica da cidade, debe avalar co seu prestixio como arqueólogo a veracidade dos ósos soterrados na catedral. Don Mauro terá que redactar un informe co resultado das súas investigacións, que será enviado a Roma para ser ratificado polo Papa León XIII. Para esta tarefa, viaxa acompañado do seu sobriño Casiano, mozo librepensador, licenciado en Xeografía e Historia, que no seu afán por buscar a verdade dende postulados científicos, causará certas reticencias tanto nos numerosos cóengos catedralicios como noutros representantes da curia eclesiástica.

Venda de entradas

As entradas para as dúas funcións de As actas escuras en Narón poranse á venda no despacho de billetes do Pazo da Cultura o venres de 11.00 a 13.30 e de 18.00 a 20.30 horas e o sábado de 17.00 a 20.00 horas. O prezo das localidades é de 8 euros para o público xeral, de 5,60 euros para os abonados e de 4 euros para usuarios do carné xoven e estudantes menores de 25 anos.

Trala súa estadía en Narón, o espectáculo exhibirase no Teatro Lauro Olmo do Barco (26 de febreiro), no Teatro Municipal-Área Panorámica de Tui (5 de marzo), no Centro Cultural Caixanova de Vigo (17 de marzo), no Teatro Rosalía da Coruña (19 e 20 de marzo), no Teatro Principal de Ourense (27 e 28 de marzo) e no Teatro Jofre de Ferrol (3 de abril).

Documentación