Axencia Galega das Industrias Culturais

Xunta de GaliciaAxencia Galega das Industrias Culturais

Noticias

ROBERTO VARELA PRESIDIU O ACTO DE APERTURA DO EVENTO, NO QUE PARTICIPAN MÁIS DE 130 PROFESIONAIS DE TODA A PENÍNSULA

O conselleiro de Cultura inaugura a XVII Feira das Artes Escénicas comprometendo o reforzo da difusión dos espectáculos galegos

[19/10/2009] O conselleiro de Cultura e Turismo, Roberto Varela Fariña, presidiu hoxe a apertura oficial da Feira Galega das Artes Escénicas 2009, que se celebra ata o vindeiro 23 de outubro en cinco escenarios de Santiago de Compostela. Máis de 130 programadores, produtores e distribuidores procedentes de toda a Península asisten dende hoxe a esta décimo sétima edición do evento, consolidado como a máis importante cita anual co sector escénico galego na súa dobre vertente de escaparate para a exhibición de espectáculos e de espazo de negocio para a contratación dos mesmos.

O conselleiro de Cultura, durante a súa visita á sede da Feira

No acto inaugural, Roberto Varela reiterou o seu compromiso de diálogo cos profesionais do teatro e a danza cara ao desenvolvemento de novos proxectos que se traduzan nunha maior difusión do seu traballo. Neste sentido, valorou o papel da Feira que organiza a AGADIC como "o primeiro paso necesario para a posta en marcha da engrenaxe que ha de relacionar o plano da creación artística co do seu coñecemento e rendibilidade social por parte do público".

Novas liñas de traballo

Entre as liñas de actuación que a Consellería de Cultura impulsará a través da AGADIC, destacou igualmente o reforzo das axudas á actividade profesional, a aposta pola consolidación do modelo de compañías residentes, a potenciación dos circuítos de distribución dentro e fóra de Galicia e a busca dunha mellor coherencia na política de colaboración cos festivais e mostras escénicas.

O conselleiro visitou a sede feiral, instalada no Auditorio de Galicia, onde asistiu ao showcase de danza Shure PG48 a cargo da compañía La Macana e -acompañado do director xeral de Promoción e Difusión da Cultura, Francisco López Rodríguez, e do director da AGADIC, Juan Carlos Fernández Fasero- percorreu a zona de mercado onde se sitúan 16 stands de asociacións e empresas escénicas. No transcurso da inauguración deste encontro profesional, presidiu así mesmo o acto de comunicación do fallo e entrega dos premios de literatura dramática convocados pola AGADIC: Álvaro Cunqueiro para Textos Teatrais, Manuel María de Literatura Dramática Infantil e Barriga Verde de Textos para Teatro de Monicreques.

Propostas heteroxéneas

Segundo sinalou o titular de Cultura e Turismo na súa intervención, Galicia ofrece como principal activo desta décimo sétima edición da Feira unha escena propia, aquí representada polas 20 compañías de teatro e danza que conforman unha variada carteleira canto a temáticas, estilos e xéneros.

Así, o programa de exhibición desta xornada inaugural ofrece a comedia O día do pai, de Malasombra Producións (Sala Mozart do Auditorio de Galicia, 16.00 h); o espectáculo Eco, no que o novo creador Iván Marcos bota man dunha linguaxe teatral heteroxénea e multidisciplinar (Sala Nasa, 18.00 h); a montaxe de danza Concerto desconcerto, da compañía Entremans (Teatro Principal, 20.30 h); e o musical de gran formato Glass City (Cidade de Cristal), de Teatro do Noroeste (Salón Teatro, 23.30 h).

A actividade artística intensificarase aínda máis na segunda xornada de Feira, durante a que o teatro infantil se incorporará ao cartel cos espectáculos Pingueiras e tarteiras, de Teatro del Andamio (Sala Mozart do Auditorio, 10.30 h), e Violeta Coletas contras as salchichas. Gulp!, de Títeres Trompicallo (ARTeria Noroeste, 12.00 h). Xa na sesión de tarde, mañá exhibiranse as montaxes ...tabú resore (tabú revuelta), do bailarín e coreógrafo Javier Martín (Sala Nasa, 19.00 h); O segredo dos Hoffman, da compañía Lagarta Lagarta (Teatro Principal, 21.00 h); e Wake Up, de Nut Teatro (Salón Teatro, ás 23.30 h).

Canto ao programa de actividades paralelas, mañá celebrarase un novo showcase de danza, no que a compañía Pisando Ovos presentará a peza Tres, así como a primeira das mesas de debate, na que xornalistas e profesionais da comunicación analizarán as estratexias para lograr unha maior visibilidade dos espectáculos escénicos nos medios de información.

Ademais dos profesionais acreditados, que teñen reservadas as súas localidades para todos os espectáculos que soliciten, o público xeral tamén pode acceder de xeito gratuíto ás montaxes programadas a partir das 16.00 horas no Auditorio de Galicia, Salón Teatro e Teatro Principal, sempre en función do aforo dispoñible. No caso das propostas para público infantil, a organización da Feira convidou a diferentes colexios da cidade para concertar a asistencia dos seus alumnos a estas representacións.

Na imaxe, o conselleiro de Cultura durante a súa visita á zona de mercado da Feira Galega das Artes Escénicas / Fotografía: Tono Arias