AGADIC

Xunta de Galicia. Consellería de Cultura e TurismoAGADIC

Noticias

A PEZA VOLVE A GALICIA TRALA SÚA PRESENTACIÓN HOXE NO PRESTIXIOSO FESTIVAL "ZAKHAREF IN MOTION" DE AMÁN (XORDANIA)

O Centro Coreográfico Galego escenifica "Giseliña" os días 29 e 30 de abril no Teatro Principal de Ourense

[27/04/2009] O Teatro Principal de Ourense acollerá o mércores 29 e o xoves 30 de abril, ás 20.30 horas, senllas funcións da última proposta do Centro Coreográfico Galego (CCG), Giseliña, creada e dirixida polo coreógrafo catalán Cisco Aznar. A unidade de danza da Consellería de Cultura chegará a Ourense procedente de Xordania, onde hoxe presenta a súa nova produción no prestixioso festival de danza Zakharef in Motion que se está a celebrar en Amán e no que participa xunto a compañías de gran relevancia internacional, como Sidi Larbi Sherkaoui & Damien Jalet de Bélxica ou City Dance Ensemble de Washington.

Giseliña

As entradas para asistir ás funcións de Ourense poderán adquirirse no despacho de billetes do Teatro Principal a partir de mañá, en horario de 11.00 a 13.30 h e de 19.30 a 20.30 h. A venda anticipada realízase a través do número de teléfono 902 434 443 ou da web www.caixagalicia.es. Ademais, coincidindo coa visita do CCG e co obxectivo de achegar a danza contemporánea á cidadanía -en particular, a linguaxe empregada por Cisco Aznar-, a bailarina e coreógrafa galega Estela Lloves impartirá mañá e o mércores catro talleres coreográficos en centros educativos e escolas de danza ourensáns, nos que participarán un total de 140 alumnos.

Coproducida xunto ao Teatro La Laboral de Xixón e o Centro Párraga de Murcia, Giseliña foi estreada o pasado mes de marzo na Coruña, iniciando despois unha ampla xira no marco da que xa visitou Santiago, Narón, Vigo, Cangas e Pontevedra, ademais de Xixón, Puertollano, Murcia e as cidades marroquís de Rabat e Tetúan. Ademais, en maio será representada en Carballo, Ferrol, Badalona e Tui.

Inspiración expresionista

A produción que protagoniza a temporada 2009 do Centro Coreográfico Galego toma como referencia o ballet clásico Giselle baixo a mirada orixinal e sorprendente de Cisco Aznar. Este catalán asentado en Suíza bota man dunha estética moi particular, excesiva e grotesca, que evoca as grandes obras do expresionismo alemán. Giseliña é unha versión totalmente contemporánea, que rompe cos códigos do ballet clásico, e na que se mesturan co movemento outras linguaxes artísticas como a vídeocreación, o cine ou as artes plásticas. O resultado é unha montaxe conmovedora que reta o espectador, esixíndolle atención e transportándoo a un mundo cheo de fantasía e referencias artísticas e cinematográficas. Os ideais románticos e a loita entre o amor e a morte están presentes en Giseliña, unha proposta de marcado carácter poético e complexidade creativa.

Cisco Aznar constrúe nesta peza un mundo polo que deambulan as pantasmas do pasado cuns movementos cargados de expresividade. Os bailaríns interpretan seres que se moven arredor das grandes paixóns, como son o amor ou a morte. A plasticidade das máscaras, a escenografía e o vestiario ideados por Luis Lara, o espazo sonoro -que inclúe as voces de Alicia Alonso e María Callas- ou os vídeos que se integran na montaxe crean unha atmosfera cargada de fantasía, que achega o espectador ao ámbito do sobrenatural.

Para a súa execución, Giseliña conta cun corpo de baile de 12 bailaríns e bailarinas de distintas procedencias, escollido a través de varias audicións públicas, e que compoñen Noemi Alberganti, Jorge Brea, Katja J. Geiger, Álvaro Esteban, Alba Fernández, Carmela García, Satoko Kojima, Amparo Novás, Ana Beatriz Pérez, Miguel Ángel Ponte, Julio César Quintanilla, Hannah Shakti e Jordi Vilaseca.

O director

Cisco Aznar é na actualidade o director artístico da compañía suíza Buissonnière. Nado en Cataluña, ao rematar os seus estudos na Escola de Arte Dramática e Coreográfica de Barcelona representa a España no Taller Coreográfico Europeo en Luxemburgo e no ano 1992 recibe unha bolsa de estudos para realizar o Taller de Maurice Béjart.

Dende 1993 traballa como bailarín e coreógrafo en Europa e América Latina, colaborando, entre outros, con compañías e profesionais como o Teatro do Liceo en Barcelona, Julio Bocca e Anna Maria Stekelmann en Bos Aires, o Grupo Vórtice en Brasil ou a compañía Nomades, Paco Decina, Redha e Philippe Lizon en Suíza. En 1998 asume a dirección artística da compañía de Lausanne Buissonnière, en Suíza.

Entre as súas creacións cómpre destacar a versión de Coppélia que realizou en 2006 para o Ballet du Grand Théàtre de Genève. En 1998 obtivo o Premio ao Mellor Espectáculo no Festival de Danse do Triángulo Mineiro (Brasil) por Adán e Pepa, en 2003 foi galardoado co Premio Jeunes Créateurs pour la Danse da Fondation Vaudoise e en 2007 obtivo o contrato de confianza de Lausanne, no Estado de Vaud e Pro Helvetia, para formar parte do equipo do Project Danse.

Ligazóns