Axencia Galega das Industrias Culturais

Xunta de GaliciaAxencia Galega das Industrias Culturais

Noticias

ACOLLERÁ TAMÉN OS CICLOS REDESONS JAZZ, REDESONS CLÁSICA E REDEDANZA

A Rede Galega de Teatros e Auditorios programa 228 funcións até decembro

[14/07/2006] Un total de 75 compañías e intérpretes protagoniza a programación da Rede Galega de Teatros e Auditorios neste segundo semestre do ano, durante o que se celebrarán 228 funcións de teatro, música, danza e maxia en diferentes escenarios dos 45 concellos e entidades que conforman este circuíto de distribución que promove o Instituto Galego das Artes Escénicas e Musicais (IGAEM) da Consellería de Cultura e Deporte.

"Carambola", de Lagarta Lagarta

Por xéneros, a Rede acollerá un total de 207 funcións teatrais dentro dun cartel no que figura a meirande parte dos espectáculos que exhiben na actualidade as compañías profesionais galegas, así como 17 concertos de música, 3 actuacións de danza e 6 de maxia.

Ao tempo que se desenvolve esta programación, mantense aberto o proceso de reforma da Rede Galega de Teatros e Auditorios, no que se está contando coa interlocución e participación directa dos diferentes sectores implicados na procura do fortalecemento deste circuíto como principal elemento de distribución das producións escénicas e musicais galegas. Neste sentido, a Comisión Técnica de Reforma –integrada por representantes do IGAEM, das distintas asociacións escénicas e programadores de Cultura municipais– redactou un borrador coas súas propostas cara a un novo sistema de funcionamento da Rede, que comezará a aplicarse en xaneiro de 2007, e que está agora en proceso de información e participación por parte dos concellos e entidades integrantes.

O obxectivo prioritario deste proceso de reforma é que a Rede incida directamente na creación dun mercado dinámico do teatro, a música e a danza, empregando a fórmula dunha "rede de espazos", cunha imaxe de marca clara e referencial para os públicos, e na que se desenvolvan as diferentes programacións específicas –teatro, danza, música, maxia...-, con orzamentos diferenciados para cada unha delas.

Na actualidade, forman parte da Rede Galega de Teatros e Auditorios medio cento de espazos xestionados por un total de 45 concellos e entidades. Por provincias, A Coruña conta con 20 integrantes (concellos da Coruña, Ferrol, Santiago de Compostela, Ames, Arteixo, Betanzos, Boiro, Carballo, Cariño, Cedeira, Cee, Culleredo, Muros, Narón, Noia, Oleiros, Ortigueira, As Pontes de García Rodríguez, Sada e San Sadurniño), Lugo con 7 (Lugo, Burela, Foz, Monforte, Ribadeo, Vilalba e Viveiro), Ourense con 3 (Padroado do Teatro Principal de Ourense e concellos do Barco de Valdeorras e O Carballiño) e Vigo con 15 (Centro Cultural Caixanova de Vigo e concellos de Vigo, Pontevedra, Cambados, Cangas, A Estrada, Gondomar, Lalín, Ponteareas, Redondela, Sanxenxo, Silleda, Tui, Vilagarcía de Arousa e Vilanova de Arousa).