Axencia Galega das Industrias Culturais

Xunta de GaliciaAxencia Galega das Industrias Culturais

Noticias

A PRODUCIÓN 'NOITE DE REIS. OU O QUE QUEIRADES' FOI RECOÑECIDA CON CINCO GALARDÓNS -ENTRE ELES, OS DE MELLOR ESPECTÁCULO E DIRECCIÓN- E 'A PIRAGUA' CON CATRO

O Centro Dramático Galego obtén nove premios na gala dos María Casares

[28/03/2008] Os espectáculos do Centro Dramático Galego Noite de Reis. Ou o que queirades e A piragua foron recoñecidos cun total de nove galardóns na gala dos XII Premios de Teatro María Casares, celebrada onte no Teatro Rosalía de Castro da Coruña.

Noite de Reis

Noite de Reis. Ou o que queirades, versión da obra de Shakespeare a cargo de Quico Cadaval, conseguiu cinco dos nove galardóns aos que optaba, entre eles o de Mellor Espectáculo. Logrou, así mesmo, o de Mellor Dirección para Quico Cadaval, Mellor Actor Secundario para Xan Cejudo, Mellor Escenografía para Baltasar Patiño, e Mellor Vestiario para Gilda Bonpresa.

Pola súa banda, Cándido Pazó recibiu o premio ao Mellor Texto Orixinal por A piragua, obra resultante da primeira experiencia de autoría residente do CDG, que acadou tamén outros tres galardóns: Mellor Actriz Protagonista para Susana Dans, Mellor Música Orixinal para Manuel Riveiro Hermo e Mellor Iluminación para Afonso Castro.

O CDG, a través da súa directora, Cristina Domínguez, quere expresar o seu agradecemento a todos os profesionais da Asociación de Actores e Actrices de Galicia (AAAG) que apostaron polo traballo desenvolvido pola compañía institucional neste último ano, así como ao público que refrendou coa súa presenza o éxito destas dúas producións.

Convocados pola AAAG, os Premios María Casares 2008 recoñeceron, ademais, o labor de Rubén García á fronte da Mostra Internacional de Teatro de Ribadavia e da meirande parte das edicións da Feira Galega das Artes Escénicas co Premio de Honra.