Axencia Galega das Industrias Culturais

Xunta de GaliciaAxencia Galega das Industrias Culturais

Noticias

CARME PORTACELI DIRIXE ESTE ESPECTÁCULO DE TEATRO COMPROMETIDO E ALTERNATIVO, QUE PODERÁ VERSE EN COMPOSTELA O SÁBADO 19, ÁS 20.30 H, E O DOMINGO 20, ÁS 18.00

A Factoría Escénica Internacional presenta 'El agresor' no Salón Teatro

[18/01/2008] A Factoría Escénica Internacional (FEI) porá en escena esta fin de semana no Salón Teatro de Compostela El agresor, montaxe teatral da que ofrecerá dúas funcións, o sábado 19 ás 20:30 horas e o domingo 20 ás 18:00 horas. Trátase dun espectáculo alternativo, fóra dos círculos convencionais, que conta coa dirección de Carme Portaceli, un dos máis destacados nomes da escena catalá.

El agresor

Con esta peza de teatro comprometido, a FEI convida a reflexionar sobre a lacra dos abusos sexuais a menores, amosando a natureza inconfesable deste tipo de delitos e a horrorosa naturalidade e indiferenza con que a viven os agresores. Os protagonistas, Petra e Paul, son dous rapaces que sofren abusos por parte do seu pai e da súa nai, respectivamente. O destino que comparten lévaos a encontrarse e xuntos tentan frear os malos tratos que soportan. Así, os dous mozos serán capaces, a partir do mero feito de nomear as atrocidades, de romper o tabú que os afogou durante toda a infancia.

Música en directo

El agresor, obra do autor alemán Thomas Jonigk, contou coa colaboración da coreógrafa e bailarina Marta Carrasco como directora de movemento. Eva Cartañà, Queralt Casasayas, Gabriela Flores, Llorenç González e Albert Pérez conforman o elenco do espectáculo, en tanto que a música foi composta por Dani Nel•lo, que a interpreta en directo xunto co tamén saxofonista Jordi Prats.

As entradas para asistir ás representacións de El agresor poranse á venda no despacho de billetes do Salón Teatro dende dúas horas antes do comezo do espectáculo. Tamén poden adquirise na billeteira electrónica a través do teléfono 902 43 44 43 ou da web www.caixagalicia.es. O prezo das localidades é de 10 euros para o sábado (cun desconto do 40% para estudantes, xubilados, usuarios do carné xoven e desempregados) e de 5 euros para o domingo, día do espectador.

Unha plataforma para as artes escénicas contemporáneas

Con sede en Barcelona, a Factoría Escénica Internacional é unha plataforma orientada á creación, produción e difusión das artes escénicas contemporáneas. Liderada pola directora teatral Carme Portaceli, está impulsada e xestionada por un colectivo de profesionais procedentes de todas as disciplinas deste sector, entre os que se atopan, Marta Carrasco, Dani Nel•lo, Lurdes Barba, Pepa López, Paco Azorín o Lluïsa Castell.

A partir dun pequeno núcleo de xestión e dos recursos que lle proporciona a Nau Ivanow de Barcelona –un centro cultural multidisciplinario–, a FEI ofrece aos seus colaboradores e participantes unha xestión profesional para os seus proxectos coa finalidade de garantir a continuidade e a estabilidade das propostas entre un público amplo e variado.

Thomas Jonigk (Eckernförde, Alemaña, 1966) cursou estudos sobre a época do medievo, literatura e teatro contemporáneo na Universidade Autónoma de Berlín. Ao fundar a compañía teatral independente Theater Affekt, inicia unha estreita colaboración co director Stefan Bachmann. Entre 1997 e 1999 traballa como primeiro dramaturgo e director no Schauspielhaus Wien, con Hans Gratzer. Entre os premios e galardóns que conseguiu cómpre destacar o premio da Fundación de Autores de Frankfurt (1993) e o do Instituto Alemán (1995), entre outros.