Axencia Galega das Industrias Culturais

Xunta de GaliciaAxencia Galega das Industrias Culturais

Noticias

HABERÁ UNHA FUNCIÓN PARA INSTITUTOS O VENRES 14 E OUTRA PARA PÚBLICO XERAL O SÁBADO 15

O Auditorio Municipal de Ribadeo acolle "Noite de Reis. Ou o que queirades"

[12/12/2007] O Auditorio Municipal de Ribadeo acolle esta fin de semana a obra do Centro Dramático Galego Noite de Reis. Ou o que queirades, que vén da man de Quico Cadaval, un dos directores máis consagrados do panorama escénico galego que se enfronta por primeira vez ao repertorio de Shakespeare. A montaxe, que está a obter un grande éxito de público con cheos na práctica totalidade das funcións ofrecidas, combina un divertido xogo de enredos, contratempos, malentendidos, enganos e desenganos con apaixonantes historias de amor e desamor.

Imaxe de "Noite de Reis"

Rebeca Montero, María Bouzas, Xosé Manuel Olveira Pico e Marcos Orsi encabezan o elenco de 10 actores e actrices -Susana Dans, Víctor Mosqueira, Xan Cejudo, Marcos Correa, Borja Fernández, Simone Negrín- e no que tamén participan os músicos Bernardo Martínez, Suso Alonso e Ramón Orencio. Prestan tamén a súa colaboración artística para a posta en escena Baltasar Patiño (escenografía e deseño de iluminación), Gilda Bonpresa (vestiario), Bernardo Martínez (espazo sonoro e dirección musical) e Dolores Centeno (maquillaxe). Como axudante de dirección exerceron Marta Lago e Rebeca Montero.

A MARIÑA, ESPAZO CDG

A compañía pública inaugura con esta montaxe, e en colaboración coas concellerías de Cultura de Ribadeo e Burela, o proxecto ‘Espazos CDG’, un servizo de creación e difusión dramática que nace como unha forma de distribución dos seus espectáculos baixo uns criterios de continuidade e accesibilidade para todos os espectadores do país. Preténdese garantir o coñecemento das propostas artísticas do CDG, así como converter a súa estadía en cada comarca nunha gran festa do teatro.

Ademais da Mariña luguesa (Burela e Ribadeo), son "Espazos CDG" O Barco de Valdeorras, Tui, Ourense, Pontevedra, Vilagarcía de Arousa, Ferrol, Narón, A Coruña e Vigo, localidades polas que, entre outras, discorrerá Noite de Reis. Ou o que queirades, nunha xira que conta coa colaboración de Caixa Galicia.

Co obxectivo de apoiar e consolidar as programacións escénicas en todos estes lugares, o equipo do CDG realizou, conxuntamente coa compañía galega de novo circo Pistacatro, unha pequena función móbil que busca sorprender coa maxia das artes escénicas aos viandantes. Con aproximadamente vinte minutos de duración, demostrará que a escena é algo cercano, divertido e sorprendente, que forma parte da vida cotiá, desenvolvendo a súa acción naqueles espazos onde transcorre o pulso diario das vilas e das cidades. En Ribadeo este espectáculo desenvolverase mañá xoves ás 13:00 horas na rúa Rodríguez Murias, mentres que en Burela terá lugar un pasarrúas con saída desde a praza do Concello ás 10.30 horas.

UNHA COMEDIA SOBRE AS TOLEMIAS POR AMOR

Noite de Reis foi unha das primeiras obras de Shakespeare, que se presume foi escrita entre 1599 e finais de 1601. Representouse ao comezo da Restauración mais non se imprimiu ata a súa inclusión no First Folio en 1623.

Trátase dunha comedia mediterránea sobre o amor e as tolemias e baballadas que este nos leva a facer. A acción comeza cando Sebastián e Violeta, irmáns xemelgos, naufragan ante a costa de Ilíria. Violeta consegue chegar case sen vida á praia. Ela cre que Sebastián morreu. Vestida de home e facéndose pasar por un paxe novo co nome de Cesario, pasa a servir na corte do duque Orsino que está "poética, apaixonada e desesperadamente namorado" da aflixida Lady Olivia, que o rexeita continuamente. Orsino utiliza a Cesario como confidente e como mensaxeiro para declararlle o seu amor a Olivia pero Cesario -Violeta, en realidade- comeza a namorarse de Orsino mentres que Olivia, pola súa parte, se namora do mensaxeiro, que é Cesario. Namentres, Malvolio, servidor de Olivia, perseguirá o amor da súa ama e, a causa dunha confusión amañada, crerase correspondido, producíndose unha serie de situacións hilarantes que o levaran case a entolecer. Ao mesmo tempo, Antonio, capitán de barco, conseguíu rescatar do mar a Sebastián. Ambos desembarcan en Ilíria. A presenza de Sebastián na cidade será o comezo do fin do enredo.

Noite de Reis. Ou o que queirades ofrecerá en Ribadeo dúas funcións: unha concertada para institutos -que terá lugar o venres 14 ás 11.00 horas-, e outra para o público xeral o sábado 15 ás 20.30 horas. As entradas, ao prezo de 5 € e 3 € (cos descontos habituais) poderanse adquirir na billeteira do Auditorio media hora antes do inicio da representación.

Documentación