Axencia Galega das Industrias Culturais

Xunta de GaliciaAxencia Galega das Industrias Culturais

Noticias

O ESPECTÁCULO DIRIXIDO POR QUICO CADAVAL SERÁ REPRESENTADO O VENRES 23, ÁS 11.00 H., PARA INSTITUTOS E O SÁBADO 24, ÁS 21.00, PARA O PÚBLICO XERAL

O Auditorio Municipal de Vilagarcía acolle dúas funcións de "Noite de Reis. Ou o que queirades"

[21/11/2007] O Auditorio Municipal de Vilagarcía de Arousa acolle esta semana a obra Noite de Reis. Ou o que queirades, que presenta o Centro Dramático Galego (CDG), da man dun dos directores máis consagrados do panorama escénico galego, Quico Cadaval. A montaxe, coa que a compañía pública iniciou o seu plan de produción propia para a actual temporada escénica 2007-2008, constitúe a primeira incursión de Cadaval no repertorio shakespearano, o que se plasma nun divertido xogo escénico de enredos, contratempos, malentendidos, enganos e desenganos con apaixonantes historias de amor e desamor.

Rebeca Montero, María Bouzas, Xosé Manuel Olveira Pico e Marcos Orsi encabezan o elenco de dez actores e actrices -Susana Dans, Víctor Mosqueira, Xan Cejudo, Marcos Correa, Borja Fernández, Simone Negrín- e no que tamén participan os músicos Bernardo Martínez, Suso Alonso e Ramón Orencio. Prestan tamén a súa colaboración artística para a posta en escena Baltasar Patiño (escenografía e deseño de iluminación), Gilda Bonpresa (vestiario), Bernardo Martínez (espazo sonoro e dirección musical) e Dolores Centeno (maquillaxe). Como axudante de dirección exerceron Marta Lago e Rebeca Montero.

Vilagarcía, espazo CDG

A compañía pública inaugura con esta montaxe, e en colaboración coa Concellería de Cultura de Vilagarcía de Arousa, o proxecto ‘Espazos CDG’, un servizo de creación e difusión dramática que nace como unha forma de distribución dos seus espectáculos baixo uns criterios de continuidade e accesibilidade para todos os espectadores do país. Preténdese garantir o coñecemento das propostas artísticas do CDG, así como converter a súa estadía en cada comarca nunha gran festa do teatro.

Ademais de Vilagarcía, son "Espazos CDG" Ourense, Tui, Vigo, Pontevedra, Ferrol, O Barco de Valdeorras, Narón, A Coruña e A Mariña (Burela e Ribadeo), localidades polas que, entre outras, discorrerá Noite de Reis. Ou o que queirades nunha xira que conta coa colaboración de Caixa Galicia.

Co obxectivo de apoiar e consolidar as programacións escénicas en todos estes lugares, o equipo do CDG realizou, conxuntamente coa compañía galega de novo circo Pistacatro, unha pequena función móbil que busca sorprender coa maxia das artes escénicas aos viandantes. Con aproximadamente vinte minutos de duración, demostrará que a escena é algo próximo, divertido e sorprendente, que forma parte da vida cotiá, desenvolvendo a súa acción naqueles espazos onde transcorre o pulso diario das vilas e das cidades, como son os mercados, as rúas, as estacións de tren e autobuses... Na localidade de Vilagarcía este espectáculo desenvolverase o xoves 22 ás 10.00 h no Centro Social (rúa de Rosalía de Castro, 24).

Unha comedia sobre as tolemias do amor

Noite de Reis é unha das primeiras obras de Shakespeare, que se presume foi escrita entre 1599 e finais de 1601. Representouse ao comezo da Restauración mais non se imprimiu ata a súa inclusión no First Folio en 1623.

Trátase dunha comedia mediterránea sobre o amor e as tolemias e baballadas que este nos leva a facer. A acción comeza cando Sebastián e Violeta, irmáns xemelgos, naufragan ante a costa de Ilíria. Violeta consegue chegar case sen vida á praia. Ela cre que Sebastián morreu. Vestida de home e facéndose pasar por un paxe novo co nome de Cesario, pasa a servir na corte do duque Orsino que está "poética, apaixonada e desesperadamente namorado" da aflixida Lady Olivia, que o rexeita continuamente. Orsino utiliza a Cesario como confidente e como mensaxeiro para declararlle o seu amor a Olivia pero Cesario -Violeta, en realidade- comeza a namorarse de Orsino mentres que Olivia, pola súa parte, se namora do mensaxeiro, que é Cesario. Namentres, Malvolio, servidor de Olivia, perseguirá o amor da súa ama e, a causa dunha confusión amañada, crerase correspondido, producíndose unha serie de situacións hilarantes que o levaran case a entolecer. Ao mesmo tempo, Antonio, capitán de barco, conseguiu rescatar do mar a Sebastián. Ambos desembarcan en Ilíria. A presenza de Sebastián na cidade será o comezo do fin do enredo.

Noite de Reis. Ou o que queirades ofrecerá en Vilagarcía de Arousa dúas funcións: unha concertada para institutos -que terá lugar o venres 23 de novembro ás 11.00 horas-, e outra para o público xeral o sábado 24 ás 21.00 horas. As entradas, ao prezo de 5 €, poderanse adquirir na billeteira do Auditorio Municipal o mesmo día da función desde dúas horas do comezo da representación.

Ligazóns