Axencia Galega das Industrias Culturais

Xunta de GaliciaAxencia Galega das Industrias Culturais

Noticias

O INFORME ELABORADO POLO IGAEM E PROXECTOS OFRECE UNHA VISIÓN GLOBAL DO SECTOR

Galiza conta con 112 compañías profesionais, a maioría sociedades limitadas con menos de 5 asalariados

[25/10/2007] O Instituto Galego das Artes Escénicas e Musicais (IGAEM) da Consellería de Cultura e Deporte presentou hoxe o documento 'Diagnose das Artes Escénicas de Galiza', no que se determina a situación actual do sector do teatro e a danza do país. O informe, que cifra en 112 as compañías profesionais que producen espectáculos, achega datos sobre os espazos culturais existentes, os tecidos produtivo e laboral, a demanda ou o tratamento por parte dos medios de comunicación, entre outros aspectos.

Presentación día 25

O resumo do informe, que foi presentado polo xerente do IGAEM, Miguel Martín, e representantes da consultora Proxectos, autora do traballo, deuse a coñecer como actividade complementaria dentro da Feira das Artes Escénicas que se está a desenvolver en Santiago de Compostela até o vindeiro día 27. O documento completo será publicado no vindeiro mes de novembro.

A devandita diagnose establece a ‘foto fixa’ do sector escénico cunha identificación do tipo de empresa máis común, os seus métodos e mesmo dificultades de produción. Así, o tipo de compañía máis representativo é a que utiliza a sociedade limitada como forma xurídica cunha media de menos de 5 asalariados e cunha facturación anual inferior aos 100.000 euros.

Das 112 compañías escénicas computadas, 81 dedícanse ao xénero teatral de actor, 11 a títeres, 9 a danza e 22 á maxia. A tendencia é a creación de compañías de repertorio ou estables como estruturas organizativas de produción de espectáculos. Son colectivos formados na meirande parte por actores/actrices ao redor dun director, que acumulan os labores de creación artística, produción e distribución.

No traballo tamén se expresan algunhas das eivas da distribución de espectáculos, como son a falla de planificación, o desaxuste entre os custos de produción e a previsión de vendas, ou a sobreoferta.

Documentación