Axencia Galega das Industrias Culturais
Noticias
ESTREA O 8 DE XANEIRO NO SALÓN TEATRO
O Centro Dramático Galego inicia os ensaios de ‘Memorias dun neno labrego’ baixo a dirección de Cándido Pazó
[27/11/2025] O director Cándido Pazó traballa xa co elenco e o resto do equipo de Memorias dun neno labrego na primeira fase dos ensaios da próxima produción do Centro Dramático Galego, coa que a compañía da Xunta de Galicia lembrará a figura de Xosé Neira Vilas no décimo aniversario do seu pasamento. Faino levando ás táboas xunto á compañía Contraproducións unha nova versión teatral desta obra referencial da literatura galega, que poderá verse no Salón Teatro de Santiago de Compostela do 8 de xaneiro ao 25 de xaneiro de 2026.
Xúlio Abonjo, Santi Romay, Manuel Cortés, Federico Pérez Rey, Iris Darriba, Mónica García e Ana Santos interpretarán os episodios máis representativos da icónica novela do autor de Vila de Cruces, que marcou varias xeracións lectoras na nosa Comunidade. No espectáculo, as lembranzas de Balbino, o rapaz da aldea, presentaranse como a memoria colectiva dunha Galicia rural que se foi diluíndo ou transformando, poñendo en primeiro termo a emoción, pero botando man tamén do humor e dunha relación directa e amena co público.
O espectáculo seguirá a voz sincera e sensible deste neno, fillo de labregos pobres, que está a medrar nun mundo de silencios, traballo e obediencia. Así, Balbino narra a vida cotiá nunha aldea galega dos anos corenta: a escola, a familia, os soños frustrados, as inxustizas sociais e o desexo constante de fuxir dun destino xa escrito.
Ademais da dirección, Cándido Pazó asina esta adaptación teatral da novela de Neira Vilas, que a día de hoxe segue a ser a máis traducida da historia da literatura galega. Para o deseño da súa proposta escénica conta tamén con Pablo Giráldez "O Pastor" na escenografía e atrezzo, Martina Cambeiro no vestiario, Xosé Lois Romero na música, Afonso Castro na iluminación e Belén Pichel na axudantía de dirección.
A venda anticipada de billetes para as funcións de Memorias dun neno labrego no Salón Teatro está xa dispoñible na web entradas.ataquilla.com.
Ligazóns
Máis noticias
- A Xunta patrocina o encontro de ‘Circo D10!’, que cumpre unha década con espectáculos, formación e encontros profesionais
- O Centro Dramático Galego coproduce en Portugal o espectáculo ‘José Afonso, ao vivo nos Coliseus, 1983’ que se estrea no Porto
- 'A serie clopen' despídese de Santiago de Compostela cun novo éxito de público
- O Centro Dramático Galego estrea esta semana as coproducións ‘Heroes en decembro’ e ‘Berenguela na gaiola’
- O Centro Dramático Galego retoma as funcións do espectáculo ‘A serie clopen’ tras o éxito da súa estrea no Salón Teatro de Santiago