Axencia Galega das Industrias Culturais

Xunta de GaliciaAxencia Galega das Industrias Culturais

Noticias

ESTE MÉRCORES 28, ÁS 21.00 HORAS, NO SALÓN TEATRO

Manoele de Felisa pon voz aos poemas de Xosé Neira Vilas no concerto-homenaxe 'Cantos de lembranza'

[26/05/2014] A Consellería de Cultura, Educación e Ordenación Universitaria colabora no concerto ‘Cantos de lembranza’, que se celebrará o mércores 28 de maio no Salón Teatro de Santiago e no que se presentarán os temas que inclúe o libro CD do mesmo título, co que se lle rende homenaxe ao escritor e académico da lingua galega Xosé Neira Vilas.

Manoele de Felisa

O secretario xeral de Política Lingüística, Valentín García Gómez, e o secretario xeral de Cultura, Anxo Lorenzo Suárez participaron o pasado venres na rolda de prensa de presentación deste libro-disco. García Gómez expresou a súa satisfacción porque a poesía de Neira Vilas se musique e poida ser cantada e repetida, na lingua propia de Galicia, por nenos e adultos. Sinalou, así mesmo, a conveniencia da homenaxe que se lle fai ao escritor con ‘Cantos da lembranza’ porque "toda unha xeración se iniciou á lectura na nosa lingua cun libro deste autor nas mans, así que os galegos nunca lle estaremos agradecidos abondo a este creador e activista infatigable".

Pola súa banda, o secretario xeral de Cultura destacou durante a presentación o interese desta iniciativa para difundir a través da música, e na voz de Manoele de Felisa, os versos de Neira Vilas, así como tamén para recoñecer a valiosa contribución do escritor e académico á literatura galega". Á presentación do concerto asistiron tamén o escritor homenaxeado e o cantautor Manoele de Felisa, quen musicou os poemas de Neira Vilas para o disco.

Entrada libre
O concerto-homenaxe a Neira Vilas ‘Cantos de lembranza’ celebrarase o mércores 28 de maio, ás 21:00 horas, no Salón Teatro de Santiago de Compostela. Artistas como Luís Emilio Batallán, Uxía Senlle ou Uxía Blanco cantarán, tocarán ou recitarán, a canda o cantautor Manoele de Felisa, os 14 poemas de Xosé Neira Vilas que se recollen no libro disco que leva o mesmo título. O acto estará conducido pola presentadora Noelia Toledano acompañada pola intérprete de lingua de signos Tareixa Cereixa. A entrada será libre e de balde ata completar a capacidade do local.

Un disco para a lembranza
O disco ‘Cantos da Lembranza’ é unha homenaxe á infancia de Xosé Neira Vilas. Un conxunto de poemas nos que o autor das "Memorias dun neno labrego" recorda a súa familia, os veciños e os espazos e situacións da súa infancia: a escola, o camposanto, o río... o seu Gres natal, en definitiva.

Manoele de Felisa converteu estes poemas en cancións e o resultado é un CD de catorce pezas musicais preparadas coa colaboración do propio Neira Vilas e interpretadas polo compositor e por figuras destacadas da música galega, como Luís Emilio Batallán ou Uxía.

O proxecto conta coa colaboración da Consellería de Cultura e Educación a través da Secretaría Xeral de Política Lingüística, da Consellería de Traballo e Benestar a través da Dirección Xeral de Xuventude e Voluntariado e mais do Concello de Vila de Cruces, do Concello de Boqueixón e da Fundación Xosé Neira Vilas.