AGADIC

Xunta de Galicia. Consellería de Cultura e TurismoAGADIC

Noticias

NO TEATRO PRINCIPAL, O SÁBADO 17 ÁS 20.30 HORAS E O DOMINGO 18 ÁS 19.00 HORAS

O Centro Dramático Galego actúa esta fin de semana en Ourense coa súa versión da obra de Eugene O'Neill 'Longa viaxe cara á noite'

[14/05/2014] A Consellería de Cultura, Educación e Ordenación Universitaria participou hoxe en Ourense na presentación das funcións do espectáculo ‘Longa viaxe cara á noite’, de Eugene O’Neill, que o Centro Dramático Galego representará no Teatro Principal este sábado 17, Día das Letras Galegas, ás 20.30 horas, e o domingo 18, ás 19.00 horas. Estes dous pases para público xeral na fin de semana, complementaranse cunha función escolar na mañá do luns 19 para estudantes de bacharelato.

Presentación 'Longa viaxe cara á noite'

O director do CDG, Manuel Guede Oliva, o actor Alberto Rolán e a directora do Teatro Principal, Olga Mojón, compartiron a presentación aos medios de comunicación das representacións en Ourense desta montaxe, a través da que a unidade de produción teatral da Xunta de Galicia se achega por primeira vez á literatura estadounidense. Faino, ademais, coa obra máis relevante do premio Nobel de Literatura Eugene O’Neill, gañador tamén de catro Pulitzer e considerado o pai fundador do teatro norteamericano moderno.

En ‘Longa viaxe cara á noite’, Manuel Guede Oliva dirixe os actores Gonzalo Uriarte, Luisa Merelas, Marcos Viéitez e Alberto Rolán na súa interpretación dos Tyrone, unha familia quebrada polas frustracións persoais e os vicios, na que se atopan moitos trazos autobiográficos dos propios O’Neill.

Xira
Estreada o pasado 22 de marzo no Salón Teatro de Santiago, ‘Longa viaxe cara á noite’ está a desenvolver unha ampla xira por diferentes espazos de Galicia e Portugal na que se combinan funcións para público xeral e pases específicos matinais dirixidos a alumnos de bacharelato.

Así, tras as súas funcións en Ourense e despois de ser representada tamén en Compostela, Braga, Pontevedra, Barcelos, Narón, A Estrada, A Coruña e Rianxo, o espectáculo visitará Vigo (Centro Cultural Fundación Novacaixagalicia, 22 e 23 de maio ás 20.30 h) e Tui (Teatro Municipal, 27 de maio ás 11.00 h). A distribución rematará no Teatro Municipal Lauro Olmo do Barco de Valdeorras o 30 de maio.

Sinopse
‘Longa viaxe cara á noite’ é a crónica dun día na vida dos Tyrone, transposición dramática dos propios O’Neill a través da que o autor estadounidense volve a vista cara á súa intensa e dolorosa xuventude, espertando os monstros que o atormentan. Cun pasado abafante, un presente en destrución e un futuro imposible, os catro membros da familia protagonista deixan caer as máscaras para deixarnos entrever as frustracións, as adiccións e o desarraigo que determinan o seu destino: James, un actor de éxito que pasou a súa vida de escenario en escenario sen poder formar un verdadeiro fogar; Mary, a súa muller, presa dunha adicción que non é quen de deixar atrás; Jamie, o fillo maior, alcohólico, cínico e descrido; e Edmund, o alter ego do escritor, un mozo soñador e romántico, pero enfermo de tuberculose.

Seguindo moitas das indicacións que o propio dramaturgo engadiu ao seu texto, a escenografía de Rodrigo Roel, a iluminación de Juanjo Amado e o espazo sonoro de Guillermo Vázquez subliñan a degradación familiar. Así, a medida que o día avanza, a néboa e o incesante son dunha serea envolven a residencia de verán dos Tyrone, que comeza entón a se tornar nun espazo tan asfixiante e agretado como as vidas dos que a habitan. Imma António Souto como axudante de dirección, María Negreira a cargo do vestiario e Fran Veiga na produción completan o equipo artístico desta produción.

Aclamada pola crítica e considerada a obra máis completa de O’Neill, ‘Long Day's Journey into Night’ foi recoñecida co Premio Pulitzer a título póstumo -o cuarto concedido a unha das súas obras- tras ser publicada poucos anos despois da morte do autor, a pesar de que este deixara instrucións de que as súas pezas inéditas non deberían ver a luz ata 25 anos despois do seu pasamento.

Venda de entradas
As entradas para as representacións desta fin de semana en Ourense están xa á venda a través da billeteira da web entradas.novagaliciabanco.com e do teléfono 902 434 443. No despacho de billetes do Teatro Principal poderán adquirirse de venres a domingo, en horario de 12.00 a 14.00 horas, e desde dúas horas antes do comezo das funcións.

Ligazóns