Axencia Galega das Industrias Culturais

CLÁSICAS DESFEITAS VOL. II

Programa de Residencias artísticas do Gaiás (REGA), en coprodución do Centro Dramático Galego (CDG) coa Cidade da Cultura

Clásicas desfeitas VOL. II:
Antígona de Sófocles
Medea de Eurípides
As Bacantes de Eurípides

En Clásicas desfeitas ides redescubrir Medea a través doutras disciplinas artísticas mais aló da literatura. Trátase de deixarse sorprender polo contido e pola forma que toma este texto tras ter traballado con el dun xeito multidisciplinar nas Residencias artísticas do Gaiás (REGA), grazas á coprodución do Centro Dramático Galego (CDG) coa Cidade da Cultura.

Phármakon é unha peza musical para viola, corno inglés, óboe, artes visuais e dous actores ou performers, composta a partir das traxedias clásicas Antígona de Sófocles, Medea e As Bacantes, ambas de Eurípides. A obra indaga en tres aspectos esenciais comúns a todas elas: a relación entre o chibo expiatorio (significado primeiro do termo antes que veleno e medicina) e a comunidade; os inestables límites da identidade persoal; e a clásica iconografía na que adoitan manifestarse tanto esa relación como esa inestabilidade: o corpo desmembrado ou transformado noutra cousa.

Por baixo destes tres aspectos alenta -e quere marcar o ton xeral da obra- un substrato dionisíaco entendido aquí, en contra das exaltadas interpretacións habituais, como ‘o elemento silencioso e poderoso do vexetativo’, en palabras do helenista Karl Kerenyi. Aínda que non se fai uso da palabra falada ou escrita en escena, o espectáculo está acompañado dun texto autoría de Pablo Seoane.

Ficha artística:
Composición e dirección: Pablo Seoane
Músicos: María José Pámpano (viola), Benxamín Otero (corno inglés e óboe)
Actores: Raquel Hernández e Artús Rei
Escenografía e iluminación: Laura Iturralde
Vestiario: Marte Martinka

21 de marzo
/// 12.00

No Salón de Convencións do CINC da Cidade da Cultura de Galicia