Axencia Galega das Industrias Culturais

Descubrindo aos Trintas de Trives

Organizado polo Proxecto de Recuperación Musical coa colaboración do Centro Dramático Galego, este concerto pretende dar a coñecer a música de Os Trintas de Trives, unha agrupación de gaiteiros ourensáns cuxo nacemento establécese a finais do século XIX, coincidindo coa chegada á vila ourensá do músico coruñés Ricardo Courtier (1865-1922).

A finais da década de 1880, Courtier despois de percorrer a grande parte da xeografía española establécese en Pobra de Trives, non só como músico, senón como director e fundador de diversas agrupacións, entre as que se atopan os famosos gaiteiros Os Trintas, arranxando e compoñendo obras que os Álvarez se encargarán de interpretar e trasladar nas súas tournées.

Acadan tal sona que son requeridos desde Cuba, para onde se embarcan a finais de 1910, participando no Centro Galego. Esta viaxe e a recepción dos exóticos ritmos de ultramar fan que pouco a pouco o seu repertorio vaia incluindo ritmos foráneos (rumbas, tangos…) que se amalgaman coa música máis tradicional. A súa traxectoria tamén os levará a Barcelona, Madrid, Bilbao, Astorga,… incluso chegaron a participar no acto de proclamación do monarca Afonso XIII.

Os Trintas de Trives constitúen para a música galega un claro referente: por unha parte no que respecta a un tipo de agrupación estable, o cuarteto de gaita, requinto, caixa e bombo; por outra parte en canto ao versátil repertorio configurado por obras compostas expresamente para a agrupación por un compositor de sólida formación musical, arranxos de obras musicais de moda en España e Europa (zarzuelas, polkas, valses, …) ou aquelas de máis fondo sabor popular.

Catro persoeiros no mundo da música galega serán os responsables de achegarnos e de recuperar a música destes senlleiros gaiteiros ourensáns:

Oscar Ibáñez (gaita)
Fernando Abreu (clarinete en mi b - requinto)
Andrés Vilán (caixa)
Julia Feijóo (bombo)

26 de maio
/// 20.30

Salón Teatro
Rúa Nova, 34. 15705, Santiago de Compostela
Teléfono: 881 867 229 (oficina) | 881 867 223 (despacho de billetes)

26 de maio
/// 12.00

Salón Teatro
Rúa Nova, 34. 15705, Santiago de Compostela
Teléfono: 881 867 229 (oficina) | 881 867 223 (despacho de billetes)