GRUPO DE TEATRO DA ASOCIACIÓN DOWN COMPOSTELA: Bodas de sangre
De Federico García Loca
Dramaturxia e dirección: Lucas Herrador
Federico García Lorca é un autor referencia do teatro universal. Unha das razóns para telo en tan alta estima é o texto que ides ter a oportunidade de ver. O autor quixo escribir unha traxedia con todas as consecuencias, sen concesións. Ambientou e rodeouna de circunstancias e personaxes que el coñecía moi ben. O resultado, lonxe de reducilo no localismo, lanzouno a tocar os sentimentos de todos os seres humanos sexan de cultura, relixión ou estado en que se encontren. Tres personaxes: A Nai, A Moza e Leonardo, teñen unha forza e un carácter que se se unisen, lograrían facer da súa pequena sociedade un referente. Non obstante cada un tira polo seu lado concentrados nas súas loitas e intereses. Consecuencia; a destrución, persoal e de todo aquilo que os rodea. Eles sábeno, coñecen o que vai pasar e van facendo o seu destino empurrados pola forza do costume, das razóns, dos impulsos ou da paixón. Isto e non outra cousa, é a traxedia. Esta historia, escrita uns anos antes de que a guerra civil devastase España, é un berro para o entendemento e a concordia, para que uns e outros buscasen os puntos comúns, xa todos sabían que era o que os separaba. Conciencia social que Lorca observaba no seu diario vivir. Esa necesidade de entenderse é o que pide a sociedade de agora mesmo. É lóxico preguntarse se todo isto non será un asunto moi serio. Pero para o colectivo de persoas con discapacidade é moi importante; integrar os seres humanos na roda social non é algo que se poida tomar a broma, demostrar en todo momento que somos capaces e queremos non é un chiste, facerse adulto é unha consecuencia de vivir e por iso agarramos as responsabilidades que se nos formulen. Xa teremos tempo de mostrar algo que provoque a vosa hilaridade. Grazas a todos os que facedes posible este proxecto. (LUCAS HERRADOR)
Elenco: Fabiola Cobián, Lorena Neira, Manuel Lens, Lucas Herrador, Elena Zas, Yone Zas, Elías Vázquez, Raquel Suárez, Adrián Cutrín, Jacobo Dopazo, Iván Allende, Álvaro Díez, Javier Cacharón, Óscar Carril, Yasmín Malas, Irene Cierto, Cristina Freire, Carlota Rodríguez, José Agra, Sergio Carballeira, Javi Prieto, David Burés, Martín Neira, Jesús Rey, Alex Lado
Iluminación: CDG
Axudante de dirección: Lorena Neira
Espazo sonoro: Down Compostela
Vestiario e escenografía: Blanca Villlar e Josefa Cacharrón
Maquillaxe: Genma Rodríguez
