Axencia Galega das Industrias Culturais

BERROBAMBÁN: Pressing Catch

Autoría: Paula Carballeira
Dirección: Quico Cadaval

Este espectáculo para adultos afonda naquilo que nos impulsa a querer contemplar a violencia, desde o circo romano ata o formato televisivo do wrestling. Pero os seus loitadores non son Hulk Hogan: son xente da vida cotiá. Así, a compañía Berrobambán fai teatro do espectáculo do pressing catch, tomando algunhas das súas convencións: os epítetos dos loitadores, a acrobacia, a música que os acompaña... Pero introducindo variantes como o coidado dos diálogos, a presenza feminina e, sobre todo, a descontextualización da loita.

En Pressing Catch, a loita que se realiza nos cuadriláteros, seguindo unhas normas determinadas, ocupa un espazo de ficción: o teatro. Nela, un DJ introduce personaxes tan próximos como Lola, unha muller de moito xenio que usa a violencia como sistema defensivo, que precisa botar a rabia fóra; o Hellmaster, avogado de éxito, cunha vida familiar que non é quen de xestionar; e A Chorona, que recorre á chantaxe emocional, a máis perigosa, a máis sutil. Todos eles controlados por un Árbitro que non quería selo, eterno perdedor nun mundo de gañadores. Naceu para ser heroe, pero tocoulle asumir o papel que ninguén quere: o que ten que evitar a dor, facer que a violencia sexa limpa, siga normas.

A montaxe vai alén da montaxe: amais de actuacións musicais en directo, achega pequenas curtametraxes realizadas por Carlos Alberto Alonso que contan a vida dos protagonistas cando están fóra do ring. Estas pezas audiovisuais contan con cameos estelares, intervencións de actores e actrices que o público poderá recoñecer e que se prestaron desinteresadamente a colaborar no proxecto.

Escenografía: Pablo "Pastor"
Vestiario: Cloti Vaello
Iluminación: Fidel Vázquez
Espazo sonoro: Soyuz
Coreografía: David Loira
Adestramento vocal: Ramón Bermejo
Elenco: Paula Carballeira, Anabell Gago, Chiqui Pereira e Hugo Torres

1 de abril - 2 de abril
/// 20.30

Salón Teatro
Rúa Nova, 34. 15705, Santiago de Compostela
Teléfono: 881 867 229 (oficina) | 881 867 223 (despacho de billetes)