Centro Dramático Galego
[21/01/2010] O Centro Dramático Galego retoma esta fin de semana (venres 22 e sábado 23 ás 20.30 horas e domingo 24 ás 18.00 horas) no Salón Teatro de Santiago as funcións para público xeral da súa nova produción, As actas escuras, de Roberto Vidal Bolaño baixo a dirección escénica de Xúlio Lago. O espectáculo, que recupera esta gran obra sobre a ocultación da verdade e o sentido da ética 18 anos despois da súa escrita, permanecerá en Compostela ata o vindeiro día 7 de febreiro ofrecendo cinco pases semanais, dous deles concertados con institutos (mércores e xoves, ás 10.30 horas).
Xosé Manuel Olveira "Pico" e Ricardo de Barreiro encabezan o elenco, do que tamén forman parte outros 12 destacados actores e actrices (César Cambeiro, Ursia Gago, Jouse García, Mónica García, Teté García, César Goldi, Xoán Carlos Mejuto, Fernando Morán, Rodrigo Roel, Pepe Soto, Agustín Vega e Marcos Viéitez), que encarnan os trinta personaxes ideados polo autor para desenvolver esta trama, centrada nunha investigación sobre o redescubrimento dos restos do Apóstolo na Compostela da segunda metade do século XIX.
De toda a información sobre As actas escuras, así como do resto da programación do espazo que xestiona en Santiago a compañía pública, dáse conta a través da web do Centro Dramático Galego e da páxina do Salón Teatro en Facebook, que botou a andar hai tres meses como nova canle de promoción das súas actividades e nestes momentos conta xa con máis de 550 seareiros rexistrados.
As entradas para as funcións deste espectáculo poden adquirirse tanto no despacho de billetes do Salón Teatro (os venres e sábados de 18.30 a 20.30 horas e os domingos de 16.00 a 18.00 horas) como a través da billeteira electrónica da web www.caixagalicia.es e do teléfono 902 43 44 43. O seu prezo é de 10 euros para venres e sábado (cun desconto do 40% para estudantes, xubilados, usuarios do carné xoven e desempregados) e de 5 euros para o domingo, día do espectador.
