Centro Dramático Galego
[16/05/2012] A Consellería de Cultura, Educación e Ordenación Universitaria suma ao programa xeral de actividades que está a desenvolver no marco da celebración do Día das Letras Galegas 2012 a Ronda poética que a Compañía Femme Fatale despregará mañá, xoves 17 de maio, polas rúas do casco antigo de Santiago.
Inserido na carteleira do Salón Teatro, este "batallón literario" chega por vez primeira a Compostela despois de ter percorrido as rúas da Coruña, Ourense ou Arteixo, entre outras localidades, para apoiar diferentes conmemoracións literarias. Mañá a Ronda poética sairá ás 12.00 horas do espazo escénico que xestiona o Centro Dramático Galego (CDG) e porá rumbo cara á rúa do Franco pola Rúa Nova e a praza do Toural, para atravesar a continuación A Raíña, Praterías e Rúa do Vilar e regresar ao Salón Teatro pola calexa que desemboca na Rúa Nova.
A golpe de versos, os seus compoñentes interactuarán cos viandantes facendo improvisacións, agasallando poemas, relatando cadáveres exquisitos, bailando, recitando e escribindo versos no chan nunha proposta moi visual e nada prosaica.
Lingua e poesía
Nelson Quinteiro, creador e director deste espectáculo de rúa, e os actores Alberto Dasinda, Fabiana Gastaldello, María Manero, Yolanda Paz, María Polo e Uxía Vázquez caracterizaranse de escritores de inspiración decimonónica co fin de reivindicar o papel da poesía e a figura do escritor e poeta como transformador social. Acompañaraos nesta ocasión o acordeonista Alex Fente, integrante do grupo Tiruleque, que será o encargado de poñer música a este pasarrúas literario.
Cunha posta en escena na que se emprega o libro como elemento escénico e por medio do movemento e da acción de recitar, o espectáculo aborda a figura do escritor desde o concepto que del mesmo habita no imaxinario colectivo. Así, esta proposta reivindica especialmente o papel da poesía e o seu espazo nas nosas vidas, na procura dunha reflexión sobre o galego a través da nosa literatura e dos nosos autores.
