Centro Dramático Galego
De Clara Gayo e Pablo Reboleiro
Pablo Reboleiro, dirección
Acrobacias imposibles, aéreos impresionantes, comedia hilarante, danza, clown e unha historia cativadora. A serie clopen é un espectáculo multidisciplinar que reflexiona, en ton de humor, sobre os retos que ten que afrontar a xuventude nestes tempos de incerteza.
Alicia é unha rapaza que está nese momento vital onde comeza a construír a súa identidade e a investigar o mundo que a arrodea. O seu cuarto segue cheo de bonecas e xoguetes, pero as preguntas invaden a súa mente. Ela, no seu afán de darlles resposta, abre unha canle onde explica curiosidades acerca dunha das súas paixóns: as matemáticas.
Pero todo o que descobre xera máis preguntas...
Poderán as "mates" explicar o momento político actual: o auxe dos absolutismos, dos fascismos, o aumento da desigualdade, ou o novo contexto bélico?
Poderá a nosa mocidade superar os retos que lles impón a súa xeración?
E, sobre todo, poderá o circo, a arte do momento presente, do físico, do risco, da cooperación, ofrecer alternativas nun mundo absolutamente dixitalizado?
